MALLAKASTËR ,04 gusht 2026/Albania Express News/-Për shkak të përkeqësimit të situatës dhe përhapjes së shpejtë të flakëve në kurorat e pishave, është vendosur ndërhyrja edhe nga ajri për të mbështetur operacionin e shuarjes së zjarrit.
Helikopteri i angazhuar në operacion ka nisur hedhjen e ujit mbi vatrat më problematike, me qëllim frenimin e avancimit të flakëve dhe krijimin e kushteve më të sigurta për ekipet që po luftojnë zjarrin nga toka. Ndërhyrja nga ajri është bërë e domosdoshme për shkak të terrenit të vështirë dhe intensitetit të lartë të zjarrit, i favorizuar nga era e fortë.
Forcat zjarrfikëse, efektivët e emergjencave civile dhe strukturat e tjera operacionale vijojnë të jenë të angazhuara në terren në një përpjekje intensive për të vënë nën kontroll flakët dhe për të parandaluar përhapjen e tyre drejt sipërfaqeve të tjera pyjore apo zonave të banuara. Situata mbetet kritike dhe po monitorohet në mënyrë të vazhdueshme nga autoritetet.