“Hotel du Lac” në Tunis, një nga emblemët më të njohura të arkitekturës brutaliste të shekullit XX, po shembet, duke shkaktuar reagime të forta nga shoqëria civile dhe ekspertë arkitekture. Ndërtesa, e ndërtuar në vitin 1973 nga italiani Raffaele Contigiani me porosi të presidentit të parë të Tunizisë, Habib Bourguiba, ka pritur artistë të njohur si James Brown, por u mbyll në vitin 2000 për shkak të keqmenaxhimit dhe problemeve të trashëgimisë.
Sipas fondit libian Lafico, i cili bleu hotelin në 2010, ndërtesa është një “rrënojë” dhe do të zëvendësohet me një qendër tregtare dhe një hotel luksoz 20-katësh, duke ruajtur konceptin dhe formën origjinale. Megjithatë, qytetarët dhe ekspertët, përfshirë arkitektin Amel Meddeb, argumentojnë se shembja pa një projekt të qartë përbën humbje të trashëgimisë kolektive dhe arkitekturore.
“Hotel du Lac” ka shpëtuar më parë dy herë nga prishja dhe u vendos nën mbrojtje të përkohshme në 2022, por kjo mbrojtje skadoi në prill 2023. Historianët arkitekturorë e konsiderojnë ndërtesën një simbol të epokës së pavarësisë tuniziane dhe një shembull të stilit brutalist që mund të transformohet në atraksion për turizëm kulturor. Një mobilizim i madh është planifikuar për në shtator për të protestuar kundër shembjes.