Bashkia e Elbasanit ka përmbyllur procesin e emërimit të 18 administratorëve të njësive administrative, pas urdhrit të Kryeministrit Edi Rama për dorëheqjen e të gjithë administratorëve në rang vendi.
Më shumë se 400 kandidatë aplikuan për të marrë pjesë në këtë proces përzgjedhjeje, që përfshiu si administratorët ashtu edhe drejtorët e institucioneve bashkiake. Kryetari i Bashkisë, Gledian Llatja, bëri të ditur se kandidaturat kaluan përmes një konkursi me shkrim dhe një interviste me gojë.
“Konkursi me shkrim është fokusuar kryesisht te njohja e problematikave të zonës, ndërsa intervista ka vlerësuar aftësitë komunikuese dhe përgjegjësinë e secilit kandidat. Kishim nevojë edhe për administratorë që përshtaten me teknologjinë, pasi shërbimet online janë rritur ndjeshëm,” u shpreh Llatja.
Ai theksoi se administratorët e rinj duhet të jenë më pranë komunitetit, të identifikojnë dhe zgjidhin çdo problematikë në kohë, si dhe të punojnë për promovimin e zonave që drejtojnë, qoftë në aspektin bujqësor apo turistik.
