VELIPOJË ,30 qershor 2026/Albania Express News/ Monitorimet e kryera sipas standardeve evropiane kanë konfirmuar cilësinë e shkëlqyer të ujit në plazhin e Velipojës.
Lajmin e bëri sot të ditur kryetari i bashklisë Shkodër, Benet Beci.
“Monitorimet e kryera sipas standardeve evropiane të Bathing Water Quality, të përdorura në të gjitha vendet e Evropës për vlerësimin e cilësisë së ujit të plazheve, konfirmojnë se cilësia e ujit të plazhit në Velipojë është e shkëlqyer”, u shpreh Beci.
Ky vlerësim, sipas tij, bazohet në analiza të rregullta mikrobiologjike dhe dëshmon se Velipoja vijon të jetë ndër destinacionet bregdetare me ujërat më të pastra në Shqipëri.
Velipoja është një nga plazhet më të mëdha ranore të vendit. Plazhi shtrihet rreth 14 km gjatësi dhe karakterizohet nga hapësira të gjera me rërë, duke e bërë të përshtatshëm sidomos për familje me fëmijë, pasi hyrja në det është graduale.
