NGA FATMIR POPJA
TIRANË ,19 qershor 2026/Albania Express News /Prof. Dr. Maksim Haxhia ka hyrë zyrtarisht në historinë e institucioneve profesionale të drejtësisë në Shqipëri, pasi më 19 qershor 2026 u rizgjodh për herë të tetë Kryetar i Dhomës Kombëtare të Avokatisë, duke siguruar një mandat të ri katërvjeçar deri në vitin 2030.
Me këtë rizgjedhje, Haxhia do të plotësojë plot 30 vite në krye të institucionit më të lartë përfaqësues të avokatëve shqiptarë, një rekord jo vetëm në Shqipëri, por edhe në rang ndërkombëtar për kohëzgjatjen e ushtrimit të pandërprerë të një funksioni të tillë drejtues në botën e avokatisë.
Zgjedhja e tij u bë nga 96 delegatë avokatë të dalë nga proceset zgjedhore lokale dhe rajonale të zhvilluara në të gjithë vendin, të cilët votuan për kreun e Dhomës Kombëtare dhe 17 anëtarët e Komitetit Drejtues. Pr.Dr.Maksim Haxhia ishte kandidati i vetëm në këtë garë, një fakt që interpretohet nga shumë aktorë të sistemit si dëshmi e konsensusit të gjerë që ai gëzon brenda komunitetit të avokatëve.
Kur Maksim Haxhia mori drejtimin e Dhomës Kombëtare të Avokatisë në vitin 2000, profesioni i avokatit në Shqipëri ndodhej ende në fazat e konsolidimit pas ndryshimeve politike dhe institucionale të viteve ’90.
Gjatë këtyre tre dekadave, sistemi i avokatisë ka njohur një zgjerim të jashtëzakonshëm. Sot Shqipëria numëron mbi 15 mijë avokatë të licencuar, ndërsa rreth 10 mijë prej tyre e kanë marrë titullin dhe licencën gjatë periudhës kur Haxhia ka drejtuar institucionin.
Çdo vit, rreth 4 mijë avokatë rezultojnë aktivë në ushtrimin e profesionit në të gjithë vendin, ndërsa afërsisht gjysma e tyre, rreth 2 mijë, ushtrojnë aktivitetin në Tiranë. Këto shifra tregojnë jo vetëm rritjen e profesionit, por edhe rolin që Dhoma Kombëtare e Avokatisë ka pasur në organizimin, standardizimin dhe mbikëqyrjen e tij.
Nën drejtimin e Haxhisë, avokatia shqiptare ka kaluar nga një strukturë relativisht e kufizuar në një organizëm profesional me ndikim të rëndësishëm në jetën juridike dhe institucionale të vendit.
Rëndësia e postit që mban Maksim Haxhia shkon përtej administrimit të komunitetit të avokatëve.
Sipas legjislacionit shqiptar, Kryetari i Dhomës Kombëtare të Avokatëve është automatikisht anëtar i Këshillit Drejtues të Shkollës së Magjistraturës, institucionit që formon gjyqtarët dhe prokurorët e ardhshëm të vendit.
Gjithashtu, ai ka rol të rëndësishëm në procese kyçe të sistemit të drejtësisë, përfshirë procedurat që lidhen me përzgjedhjen e anëtarëve të Këshillit të Lartë Gjyqësor (KLGJ) dhe Këshillit të Lartë të Prokurorisë (KLP), institucione që përbëjnë shtyllat kryesore të drejtësisë së reformuar shqiptare.
Për këtë arsye, pozicioni i kreut të Dhomës Kombëtare të Avokatisë konsiderohet një nga funksionet më të rëndësishme në arkitekturën juridike të vendit.
Prof. Dr. Maksim Haxhia është një nga figurat më të njohura të jurisprudencës shqiptare.Ai u diplomua në Fakultetin e Drejtësisë të Universitetit të Tiranës në vitin 1982 dhe tre vite më vonë përfundoi studimet edhe në Fakultetin e Ekonomisë. Karriera e tij akademike është shoqëruar me një sërë titujsh dhe kualifikimesh të larta, duke filluar nga “Kandidat i Shkencave” në vitin 1990, “Doktor i Shkencave Juridike” në vitin 1994, “Profesor i Asociuar” në vitin 2004 dhe “Profesor” në vitin 2013.
Gjatë viteve ai ka kryer specializime të shumta brenda dhe jashtë Shqipërisë, përfshirë edhe një specializim në Universitetin e Harvardit.
Në vitin 1992 ai mbajti postin e Prokurorit të Përgjithshëm të Republikës së Shqipërisë, ndërsa po atë vit iu bashkua Dhomës Kombëtare të Avokatisë, ku do të ndërtonte më pas karrierën më të gjatë drejtuese në historinë e institucionit.
Përveç aktivitetit profesional dhe akademik, Haxhia ka qenë pjesë e proceseve më të rëndësishme të ndërtimit institucional të shtetit shqiptar.
Ai ka qenë anëtar i stafit teknik që kontribuoi në hartimin e Kushtetutës së Republikës së Shqipërisë në vitin 1998, si dhe pjesë e grupit të punës për ligjin “Për Deklarimin dhe Kontrollin e Pasurive, të Detyrimeve Financiare të Zyrtarëve Publikë dhe disa nëpunësve publikë”.
Një nga kontributet më të rëndësishme mbetet autorësia e ligjit “Për profesionin e avokatit në Republikën e Shqipërisë”, akt që përcaktoi bazat moderne të organizimit të profesionit dhe funksionimit të avokatisë shqiptare.
Paralelisht, ai ka vijuar aktivitetin akademik si pedagog në Fakultetin e Drejtësisë, pedagog në Shkollën e Magjistraturës dhe Kryetar i Komitetit Shkencor të Shkollës së Avokatisë.
Rizgjedhja e tetë radhazi e Prof. Dr. Maksim Haxhisë nuk përfaqëson vetëm vazhdimësinë e drejtimit të një institucioni profesional. Ajo vulos një rekord historik prej tre dekadash në krye të avokatisë shqiptare, një periudhë gjatë së cilës profesioni ka njohur zgjerim, institucionalizim dhe ndikim të shtuar në sistemin e drejtësisë.
Me mandatin e ri deri në vitin 2030, Haxhia konfirmon statusin e tij si një nga figurat më jetëgjata dhe më ndikimplotë të drejtësisë shqiptare në periudhën postkomuniste, duke mbetur simbol i vazhdimësisë dhe stabilitetit në përfaqësimin e komunitetit të avokatëve të vendit.