TIRANË,23 maj 2026/Albania Express News/Kapacitetet operacionale dhe hetimore të Policisë së Shtetit janë forcuar ndjeshëm falë një donacioni të ri të ofruar në kuadër të projektit “Mbështetja e BE-së për Forcimin e Luftës kundër Kontrabandës së Migrantëve dhe Trafikimit të Qenieve Njerëzore në Ballkanin Perëndimor – EU4FAST”.
Në ceremoninë e organizuar për dorëzimin e pajisjeve dhe mjeteve logjistike moderne morën pjesë përfaqësues të Policia e Shtetit, të Delegacioni i Bashkimit Evropian në Shqipëri, të Ambasada Franceze në Shqipëri, si dhe përfaqësues të ambasadave partnere dhe organizatave të përfshira në zbatimin e projektit.
Drejtori i Përgjithshëm i Policisë së Shtetit, Skender Hita, vlerësoi mbështetjen e vazhdueshme të Bashkimit Evropian për strukturat ligjzbatuese shqiptare. Ai theksoi se pajisjet dhe automjetet e reja do të ndikojnë drejtpërdrejt në rritjen e eficiencës së hetimeve për krimin kibernetik, menaxhimin e kufijve, këqyrjen e vendit të ngjarjes dhe luftën kundër krimit ndërkufitar e kontrabandimit të migrantëve.
Në kuadër të këtij projekti, Policisë së Shtetit iu dorëzuan licenca të programit “Mercure”, që do të përdoren për hetimin e krimeve kibernetike dhe analizën e riskut, skanerë portativë CTMS për kontrollin e dokumenteve dhe identifikimin e dokumenteve të falsifikuara, një furgon i dedikuar për transportin e migrantëve, si dhe një automjet modern në mbështetje të hetimeve të Policisë Shkencore në vendngjarje.
Përmes projektit EU4FAST, Bashkimi Evropian vijon të mbështesë forcimin e strukturave ligjzbatuese në Ballkanin Perëndimor, duke synuar goditjen e rrjeteve kriminale, mbrojtjen e personave vulnerabël dhe garantimin e sigurisë dhe sundimit të ligjit.