Nga Xhensil Shkëmbi
Fillimisht, do u lutesha të gjithëve që kanë mundësi për të ndihmuar këtë vajzë të vogël, ta bënin. Një familje nga Voskopi i Korçës sapo ma çoi. Gjendja është kritike, ndaj keni të shënuar numrin e llogarisë, jeni të lutur të kontribuoni.
Së dyti – ky është rasti i disatë që po postoj cdo ditë të prindërve që të shkatërruar ekonomikisht, shpirtërisht e mendërisht kanë nevojë për ndihmë. Unë nuk jam prind dhe ende nuk e kuptoj plotësisht atë ndjenjë por të qënit afër çdo ditë, për shkak të profesionist, hallexhinjëve kam kuptuar se halli më i madh është të të sëmuret fëmija e mos kesh çfarë t’i bësh.
Së treti – ore, ka ardhur momenti që ne si shqiptarë mos kërkojmë më “lëmoshë” e ndihmojmë njëri tjetrin por shteti të përgjigjet institucionalisht. Janë mbi 20 milion euro të mbledhura për fëmijët nëpër GoFundMe e platforma të tjera bamirësie në vit. Punë të konsiderueshme bëjnë e organizatat bamirëse por përse unë, ti e ai tjetri t’i lutet organizatave e njerëzve për të shëruar fëmijën, kur shteti duhet të përgjigjet, fillimisht për ta kuruar brenda vendit e më pas, në rastin tjetër, për të financuar kurimin jashtë vendit. A po e kuptoni qe kjo gjendje bëhet e stërmundimshme? Unë kam një javë që po marr përditë mesazhe për thirrje ndihmash dhe jam lodhur shpirtërisht e mendërisht, pasi e ndien veten të padobishëm në këto raste.
Së katërti – Shqiptarët janë të mirë. Mbase ngaqë kanë kaluar plot halle vet. Mbase ngaqë janë të vuajtur. Por jemi popull sensibël e human. Ndihmojmë njeri tjetrin.
Së pesti – Kosova, Macedonia e Veriut, Mali i Zi kanë një fond të posaçëm për fëmijët që nuk i kurojnë dot brenda vendit. Për shembull, Kosova ka 10 milion euro të alokuara për këtë punë. I dërgon jashtë dhe i kuron. Në Shqipëri fondi është 0! Zeroooooooooooooo. Bëjani këtë pyetje ministres së shëndetësisë, kryeministrit dhe atyre në Tiranë. Përse Shqipëria ka zero fonde?!
E rikthej e njëherë tjetër thirrjen, ndihmoni këtë vajzë të vogël nga një fshat i Korçës. Ndihmojeni sa keni mundësi!