TIRANË, 11 maj 2026/Albania Express News/ Shqipëria po prezantohet në Bienalen e Venecias 2026 me pavijonin kombëtar “A Place in the Sun” nga artisti Genti Korini, duke theksuar identitetin kulturor dhe krijues të vendit në një nga skenat më prestigjioze ndërkombëtare të artit bashkëkohor.
Kryeministri Edi Rama ndau sot foto nga aktiviteti, duke shprehur krenarinë e tij për përfaqësimin dinjitoz të Shqipërisë në art dhe kulturë.
“Me krenarinë për Shqipërinë në Bienalen e Venecias 2026, ku vendi ynë përfaqësohet me dinjitet edhe në art e kulturë”, u shpreh Rama.
Pavijoni u inaugurua në edicionin e 61-të të Bienales së Venecias dhe prezantoi një instalacion multidimensional që ndërthur video, performancë live, animacion dhe teatër kukullash.
Projekti i Korinit krijon një hapësirë ku identiteti paraqitet si proces i hapur interpretimi, duke reflektuar mbi historinë dhe narrativat bashkëkohore.
Pavijoni do të qëndrojë i hapur për publikun nga 9 maji deri më 22 nëntor 2026, duke ofruar një platformë për ekspozim, reflektim dhe dialog ndërkombëtar.