TIRANË,4 maj 2026/Albania Express News/Studiuesi dhe aktivisti i njohur Auron Tare ka ngritur shqetësime të forta lidhur me nismën “Paketa e Maleve”, përmes një reagimi të gjatë në rrjetet sociale, ku vë në pikëpyetje mënyrën e hartimit dhe zbatimit të saj.
Në një rrëfim simbolik nga një takim me një deputete të maxhorancës, Tare evidenton mungesën e theksuar të informimit dhe debatit real mbi ligjet që miratohen, duke sugjeruar se shpesh vendimmarrja bëhet pa kuptuar plotësisht pasojat.
Sipas tij, edhe pse “Paketa e Maleve” si ide mund të konsiderohet pozitive, zbatimi i saj pa studime të mirëfillta rrezikon të deformojë identitetin e zonave malore shqiptare. Tare sjell shembuj konkretë, duke paralajmëruar për një përzierje arkitekturore pa identitet, ku ndërtimet e reja nuk respektojnë traditën dhe karakterin e fshatrave.
Ai thekson se mungojnë analizat mbi ndikimin ekonomik të turizmit, studimet mbi arkitekturën tradicionale dhe një strategji e qartë për zhvillimin e qëndrueshëm. Në këtë kontekst, përmendet edhe rasti i Thethi, që sipas tij përbën një shembull ku “suksesi” turistik është shoqëruar me pasoja sociale dhe zhvillim të pakontrolluar.
Tare kritikon gjithashtu nismat e mëparshme, si projekti “100 fshatrat”, të cilin e cilëson si një dështim që mbeti në nivel fasade. Ai ngre shqetësimin për mungesën e investimeve bazë në zonat malore, duke përmendur mungesën e shërbimeve shëndetësore, transportit publik, menaxhimit të mbetjeve dhe strukturave të emergjencës.
Një tjetër problem i theksuar është braktisja e fshatrave dhe largimi i të rinjve, çka sipas tij e bën të paqartë se kush do të punojë në strukturat turistike që synohen të zhvillohen. Në këtë linjë, ai nënvizon edhe rrezikun e zhdukjes së jetës baritore, duke e cilësuar atë si një pasuri të pazëvendësueshme kulturore.
Në përfundim, Auron Tare apelon për marrjen e modeleve të suksesshme nga vendet fqinje dhe për hartimin e politikave të mirëstudiuara, në mënyrë që “Paketa e Maleve” të mos mbetet thjesht një nismë propagandistike, por të kthehet në një instrument real zhvillimi për zonat malore të Shqipërisë.