Në Teatrin “Skampa”, në praninë e personaliteteve të njohura dhe shumë të ftuarve, u organizua aktiviteti kulturor “Margaritarët e Fjalës”.
Mbrëmja u çel me prezantimin e ekspozitës së piktorit elbasanas Gazmend Xhaferri, duke i dhënë aktivitetit një dimension të veçantë artistik.
Programi vijoi me një kënd të dedikuar librit nga shtëpitë botuese “M&B” dhe “Jozef”, shfaqjen e një dokumentari mbi pasurinë e gjuhës shqipe, si dhe me ceremoninë e vlerësimit për figura që kanë kontribuar në lartësimin e fjalës shqipe.
Në këtë aktivitet morën pjesë Kryetari i Bashkisë Elbasan, Gledian Llatja, dhe Kryetarja e Këshillit të Qarkut, Ermira Urupi, të cilët theksuan rëndësinë e promovimit të identitetit kombëtar përmes artit, historisë dhe letërsisë.
Në shenjë vlerësimi të veçantë, titulli “Nderi i Qarkut” iu akordua znj. Ilirjana Sulkuqi për kontributin e saj të çmuar në letërsinë shqipe dhe për përkushtimin në ruajtjen dhe promovimin e kulturës kombëtare, brenda dhe jashtë vendit, veçanërisht në diasporë.