Për të dytin vit radhazi, degët e informatikës dhe inxhinierisë janë më të kërkuarat nga maturantët shqiptarë për studimet e larta. Mbi 30% e aplikantëve këtë vit kanë zgjedhur një nga këto programe, duke lënë pas degët e mjekësisë dhe infermierisë.
Drejtori i Rrjetit Akademik Shqiptar, Arjan Xhelaj, thekson se zgjedhjet e të rinjve reflektojnë kërkesat e tregut të punës, si vendas ashtu edhe të huaj. Ndërkohë, degët e mësuesisë mbeten më pak të preferuara, me rreth 1,500 aplikime, si vitet e mëparshme.
Pas përfundimit të konkurseve për programet me kritere shtesë si Mjekësia e Përgjithshme, Arkitektura, Artet dhe Sportet, universitetet do të publikojnë rezultatet. Listat e fituesve pritet të shpallen në javën e fundit të gushtit, për t’u vijuar me regjistrimet.
Këtë vit kanë aplikuar mbi 20,200 maturantë, një rritje krahasuar me vitin e kaluar. Universitetet publike mbajnë 70% të aplikimeve, ndërsa 30% i përkasin institucioneve private.