Nënkryetari i Partisë Demokratike, Luçiano Boçi, ka publikuar pamje nga landfilli i Bushatit të përfshirë nga flakët, duke e cilësuar situatën si një katastrofë të rëndë mjedisore dhe kërcënim serioz për shëndetin e banorëve të zonës.
Përmes një reagimi në rrjetet sociale, Boçi akuzon drejtpërdrejt kryeministrin Edi Rama për keqmenaxhim të mbetjeve dhe për vendime që, sipas tij, kanë çuar në mbingarkimin e landfillit përtej kapaciteteve. Ai thekson se në Bushat janë depozituar mbetje jo vetëm nga qarku i Shkodrës dhe Lezhës, por edhe nga zona të tjera si Elbasani dhe Fieri, si pasojë e mosfunksionimit të inceneratorëve.
Sipas Boçit, kjo situatë lidhet me atë që ai e quan “dështimi i inceneratorëve”, projekte që sipas opozitës kanë përthithur miliona euro pa dhënë rezultatet e pritshme. Ai shton se zjarri në landfill mund të jetë i qëllimshëm, me synim krijimin e hapësirave të reja për depozitimin e mbetjeve, duke e cilësuar këtë si një praktikë të përsëritur.
“Pamjet apokaliptike vijnë nga landfilli i Bushatit në flakë që prej paradites së sotme. Dëmi në mjedis dhe në shëndet është i pallogaritshëm,” – shprehet Boçi, duke shtuar se situata ishte paralajmëruar më herët nga opozita dhe ekspertët, por nuk janë marrë masa parandaluese.
Ai e cilëson Bushatin si një shembull të “keqmenaxhimit dhe korrupsionit”, ndërsa paralajmëron për pasoja të rënda për mjedisin dhe komunitetin lokal.
Deri më tani nuk ka një reagim zyrtar nga qeveria lidhur me akuzat e ngritura, ndërsa pritet që institucionet përgjegjëse të japin informacion mbi shkaqet e zjarrit dhe masat e marra për vënien nën kontroll të situatës.