Kryetari i Bashkisë Elbasan, Gledian Llatja, ka pritur në një takim zyrtar në zyrën e tij përfaqësues të Këshilli Kombëtar Shqiptar në Luginën e Preshevës, të kryesuar nga Enkel Rexhepi, si edhe Ambasadorin e Republikës së Shqipërisë në Beograd, Bardhyl Canaj.
Në fokus të takimit ishte mbështetja për studentët nga Lugina e Preshevës, të cilët në numër të lartë ndjekin studimet e larta në Universiteti “Aleksandër Xhuvani”.
Gjatë bisedës, Llatja theksoi se Bashkia e Elbasanit do të vijojë të ofrojë akomodim dhe lehtësira të tjera për këta studentë, duke u qëndruar pranë në çdo hap të rrugëtimit të tyre akademik. Ai nënvizoi se kjo mbështetje mbetet një prioritet, në funksion të arsimit, të rinjve dhe forcimit të lidhjeve kombëtare.
Takimi u vlerësua gjithashtu si një hap i rëndësishëm për forcimin e bashkëpunimit dhe lidhjeve ndërmjet shqiptarëve në rajon, duke vendosur theksin te rëndësia e arsimit si një urë lidhëse mes tyre.