TIRANË, 7 prill /Albania Express News/Kryetari i Kuvendit, Niko Peleshi zhvilloi sot një takim me ambasadorin e Azerbajxhanit në Shqipëri, Anar Huseynov, si dhe me drejtorin ekzekutiv për Ballkanin të Kompanisë Shtetërore të Naftës, Murad Heydarov.
Gjatë takimit u diskutua mbi avancimin e bashkëpunimit dypalësh në fushat politike, ekonomike dhe tregtare, si dhe mbi intensifikimin e bashkëpunimit parlamentar ndërmjet dy vendeve.
Palët vlerësuan marrëdhëniet shumë të mira mes Shqipërisë dhe Azerbajxhanit, duke theksuar rëndësinë e thellimit të mëtejshëm të tyre në sektorë strategjikë, veçanërisht në energjetikë.
Një vëmendje e veçantë iu kushtua projektit të gazifikimit në qytetin e Korçës, i konsideruar si një hap i rëndësishëm drejt zhvillimit të qëndrueshëm energjetik dhe nxitjes së rritjes ekonomike në rajon.