Drejtuesi politik i Partisë Socialiste për Qarkun Elbasan, Arbjan Mazniku, ka vijuar turin e takimeve në terren në Bashkinë e Belshit, duke ndalur në disa prej zonave kryesore si Kosovë e Madhe, Çerragë, Hardhi dhe Fierzë.
Në një postim të bërë publik në rrjetet sociale, Mazniku thekson se këto takime janë pjesë e një procesi të gjerë riorganizimi dhe energjizimi të strukturave të Partisë Socialiste në nivel lokal. Sipas tij, qëllimi është forcimi i bashkëpunimit mes anëtarëve dhe përfshirja aktive e komunitetit në adresimin e problematikave konkrete.
“Vijojmë takimet në çdo zonë e në çdo fshat për të dëgjuar njëri-tjetrin, për të identifikuar problemet dhe për të ofruar zgjidhje konkrete”, shprehet Mazniku, duke vënë theksin te rëndësia e komunikimit të drejtpërdrejtë me qytetarët.
Ai nënvizon gjithashtu transformimin që ka pësuar Belshi gjatë viteve të fundit nën qeverisjen socialiste, duke e cilësuar si një shembull të zhvillimit lokal dhe investimeve të prekshme në infrastrukturë dhe shërbime.
Në qendër të angazhimit politik, sipas Maznikut, mbetet jo vetëm vijimi i projekteve për zhvillimin e Belshit, por edhe objektivi strategjik i integrimit të Shqipërisë në Bashkimin Europian.
Ky tur takimesh shihet si një përpjekje për të forcuar më tej strukturat politike në terren dhe për të garantuar një qasje më të afërt me qytetarët, në funksion të përmirësimit të jetës në komunitet dhe përparimit të vendit drejt standardeve europiane.
