Të paktën 22 persona u plagosën pasi një tren pasagjerësh doli nga shinat në rajonin e Ulyanovsk, rreth 900 kilometra në lindje të Moskës, ndërsa autoritetet rajonale njoftuan se nuk pati viktima.
Shtatë vagonë të trenit që lidhin Chelyabinsk me Moskën dolën nga shinat në aksidentin që ndodhi herët në mëngjes, sipas guvernatorit rajonal, Alexei Ruskih. Aksidenti ndodhi pranë stacionit Briandino, rreth 70 kilometra nga qyteti i Ulyanovsk, ku guvernatori shkoi për të inspektuar vendngjarjen.
“Sipas informacioneve fillestare, dy pasagjerë pësuan fraktura dhe njëzet të tjerë, përfshirë një fëmijë, pësuan mavijosje”, shkroi guvernatori i rajonit Chelyabinsk, Alexei Teksler, në një postim në Telegram.
Komiteti Hetues Rus ka nisur një hetim për shkelje të rregulloreve të sigurisë dhe operimit hekurudhor, dhe hetuesit e tij kanë shkuar në vendin e aksidentit.
Treni mbante gjithsej 412 pasagjerë, sipas një zyrtari të Hekurudhave Ruse. Ky aksident është një nga incidentet më serioze hekurudhore në rajon vitet e fundit, megjithëse fatmirësisht nuk ka pasur viktima.