Një lajm i rëndësishëm për arsimin e lartë shqiptar vjen nga Universiteti “Aleksandër Xhuvani” i Elbasanit i cili shënon një tjetër hap të madh në arenën ndërkombëtare akademike. Rektorja e këtij institucioni, Prof. Dr. Elvira Fetahu, është zgjedhur Presidente e Aleancës së Universiteteve të Ballkanit (BUA) për vitin 2028, një nga rrjetet më të rëndësishme universitare në rajon.
Ky vlerësim nuk është vetëm një arritje personale për Prof. Dr. Elvira Fetahu, por edhe një dëshmi e rritjes së ndikimit dhe reputacionit të Universitetit të Elbasanit në nivel rajonal dhe më gjerë. Me këtë zgjedhje, ky universitet shqiptar merr një rol drejtues në një organizatë që përfshin rreth 120 universitete nga vendet e Ballkanit, duke u bërë një pikë referimi për bashkëpunimin akademik dhe shkëmbimin e përvojave.
Pjesë e Aleancës së Universiteteve të Ballkanit që prej vitit 2015, Universiteti “Aleksandër Xhuvani ” i Elbasanit ka ndërtuar ndër vite një profil gjithnjë e më të konsoliduar në projekte të përbashkëta, mobilitete akademike dhe iniciativa kërkimore. Marrja e presidencës së kësaj aleance në vitin 2028 përfaqëson një kulm të këtij angazhimi dhe një mundësi të artë për të udhëhequr procese të rëndësishme në zhvillimin e arsimit të lartë në rajon.
Ky zhvillim pritet të sjellë përfitime konkrete për studentët dhe stafin akademik, duke hapur më shumë mundësi për shkëmbime ndërkombëtare, projekte kërkimore të përbashkëta, si dhe përmirësimin e standardeve të mësimdhënies dhe kërkimit shkencor. Njëkohësisht, ai forcon rolin e Shqipërisë si një aktor aktiv në hartëzimin e politikave arsimore dhe shkencore në Ballkan.
Zgjedhja e Prof. Dr. Elvira Fetahu në krye të BUA-s vjen si një tregues i besimit që komuniteti akademik rajonal ka ndaj lidershipit të saj dhe vizionit për një bashkëpunim më të thelluar mes universiteteve. Nën drejtimin e saj, pritet që Aleanca të intensifikojë përpjekjet për ndërkombëtarizim, inovacion dhe rritje të cilësisë në arsimin e lartë.
Zgjedhja e Prof .Dr.Elvira Fetahu në postin e Presidentes së Aleancës së Universiteteve të Ballkanit për vitin 2028-është një moment historik për Universitetin “Aleksandër Xhuvani” të Elbasanit një arritje që reflekton potencialin e institucioneve shqiptare për të qenë liderë në zhvillimet akademike rajonale.
