Është shtyrë seanca gjyqësore e datës 1 prill 2026 ndaj Kryetarit të Bashkisë së Tiranës, Erion Veliaj. Lajmi u bë i ditur përmes një deklarate për media nga mbrojtësi i tij, avokati Plarent Ndreca, i cili sqaroi se shkak për shtyrjen nuk ishte pala mbrojtëse apo vetë Veliaj, por mungesa për arsye shëndetësore e një prej avokatëve të tjerë në proces.
Në deklaratën e tij, Ndreca thekson se mbrojtja ka vendosur të ndjekë një praktikë të rregullt komunikimi pas çdo seance, për të garantuar informim të saktë dhe transparent për publikun, duke pasur parasysh, sipas tij, raportimet jo gjithmonë të plota dhe të njëtrajtshme në media.
Avokati shprehu shqetësim për atë që e cilësoi si “trysni të pajustifikuar” nga ana e përfaqësuesve të akuzës për të përshpejtuar procesin gjyqësor. Sipas tij, ky nxitim ka ndikuar më herët edhe në humbjen e një shkalle gjyqësore, duke cenuar parimet kushtetuese në fazën paraprake.
“Mbrojtja udhëhiqet nga detyrimi për të garantuar pa kompromis të drejtat kushtetuese dhe ligjore të çdo qytetari”, thuhet në deklaratë, ku theksohet se rasti i Veliajt ka një dimension të veçantë për shkak të funksionit publik që ai mban dhe interesit të gjerë qytetar.
Ndreca solli në vëmendje edhe përmasat e dosjes gjyqësore, duke e cilësuar atë jashtëzakonisht voluminoze dhe komplekse. Sipas tij, dosja përmban rreth 60 mijë faqe, përfshin 30 të pandehur, mbi 1,000 prova dhe 190 dëshmitarë, ndërsa vetëm kërkesa për gjykim e prokurorisë është mbi 500 faqe.
Ai argumentoi se një volum i tillë kërkon kohë për analizë të thelluar dhe përgatitje profesionale, duke iu referuar edhe standardeve të Gjykatës Europiane të të Drejtave të Njeriut, sipas të cilave një profesionist nuk mund të përpunojë në mënyrë cilësore më shumë se 180 faqe në ditë.
“Nxitimi nuk i shërben drejtësisë dhe rrezikon të cenojë një proces të rregullt ligjor”, theksoi avokati, duke shtuar se mbrojtja do të vijojë të bëjë publike çdo kërkesë dhe komunikim me gjykatën, për të garantuar transparencë të plotë për opinionin publik.
Çështja ndaj Veliajt mbetet një nga proceset më të ndjekura në vend, për shkak të peshës së saj politike dhe institucionale, ndërsa pritet që seanca e radhës të zhvillohet në një datë të re që do të përcaktohet nga gjykata.