Nga Vladimir Selamaj
Athinë – Komuniteti shqiptar në Greqi po shënon një tjetër moment të rëndësishëm në rrugën e tij të integrimit dhe përfaqësimit, teksa mbi 20 emigrantë shqiptarë janë bërë pjesë e garës për zgjedhjet e 15 marsit për përfaqësuesit në kongresin e PASOK, duke sinjalizuar rritjen e rolit të shqiptarëve në jetën politike të vendit fqinj.
Lajmi vjen në një kohë kur pjesëmarrja e komunitetit shqiptar në Greqi nuk mbetet më vetëm në kufijtë e kontributit ekonomik dhe shoqëror, por po merr gjithnjë e më shumë formë edhe në strukturat politike, aty ku merren vendime dhe ndërtohen raportet e së ardhmes.
Ky zhvillim u konfirmua gjatë një bisede telefonike me një nga figurat më të njohura dhe aktivistët më të hershëm të emigracionit shqiptar në Greqi, Anastas Murati, i cili e cilësoi këtë si një moment të rëndësishëm për vetëdijen politike dhe qytetare të shqiptarëve që jetojnë prej dekadash në shtetin grek.
Sipas tij, PASOK po tregon një hapje më të madhe ndaj komunitetit shqiptar, duke i dhënë mundësi konkrete përfaqësuesve të tij që të bëhen pjesë e forumeve vendimmarrëse. Për Muratin, kjo nuk është thjesht një garë elektorale e zakonshme, por një tregues i qartë se shqiptarët në Greqi kanë fituar terren, besim dhe respekt në shoqërinë ku jetojnë e kontribuojnë çdo ditë.
Mbi 20 kandidatë shqiptarë në një proces të tillë përbëjnë jo vetëm një shifër domethënëse, por edhe një mesazh të fortë: komuniteti shqiptar po organizohet, po maturohet politikisht dhe po kërkon të ketë një zë të denjë në jetën publike greke.
Edhe më i rëndësishëm bëhet ky fakt për shkak të profilit të kandidatëve, të cilët përfaqësojnë fusha të ndryshme të jetës profesionale dhe qytetare, nga arsimi, drejtësia, biznesi, deri te sektorë të tjerë me ndikim në komunitet. Kjo shumëllojshmëri, sipas Muratit, pritet të sjellë cilësi më të lartë në përfaqësim dhe një qasje më të plotë ndaj problematikave dhe nevojave të shqiptarëve në emigracion.
Një tjetër element i rëndësishëm që ai veçoi gjatë bisedës ishte edhe përfshirja e brezit të ri të emigrantëve shqiptarë. Sipas Muratit, të rinjtë po dëshmojnë se kanë energjinë, formimin dhe vizionin për të çuar më tej përfaqësimin e shqiptarëve, duke ndërtuar ura më të forta bashkëpunimi me politikën dhe institucionet greke.
Por, krahas entuziazmit për të rinjtë, ai nuk la pa përmendur edhe rolin themelor të brezave të parë të emigracionit shqiptar, të cilët me shumë sakrifica hodhën themelet e integrimit, fituan respektin e shoqërisë greke dhe krijuan terrenin që sot brezat pasardhës të mund të trokasin me dinjitet në dyert e politikës.
Në këtë kontekst, Murati përmendi me vlerësim edhe disa nga emrat e kandidatëve shqiptarë që garojnë në këto zgjedhje, si Zamira Doko, Lindita Kulla, Lefteri Metka dhe Argita Piperi, duke nënvizuar kontributin e tyre në jetën komunitare dhe angazhimin për të përfaqësuar sa më denjësisht zërin e shqiptarëve në Greqi.
Një notë simbolike mori edhe një detaj interesant i ndarë gjatë bisedës, ku Murati përmendi faktin se krijimi i degës së Partisë Socialiste të Shqipërisë në Athinë përkon me ditëlindjen e autorit, një rastësi që ai e cilësoi si domethënëse për komunitetin shqiptar dhe për historinë e organizimit të tij në emigracion.
Në thelb, kjo pjesëmarrje e gjerë e emigrantëve shqiptarë në zgjedhjet e PASOK-ut përfaqëson më shumë sesa një proces të zakonshëm partiak. Ajo përfaqëson një etapë të re vetëdijesimi, integrimi dhe afirmimi për një komunitet që prej vitesh është pjesë aktive e realitetit grek dhe që tashmë po synon me të drejtë të jetë pjesë edhe e vendimmarrjes politike.
Ky është një zhvillim që flet jo vetëm për pjekurinë e komunitetit shqiptar në Greqi, por edhe për peshën që ai ka fituar ndër vite në jetën ekonomike, sociale dhe qytetare të vendit fqinj.
Në fund, në shenjë respekti dhe mirënjohjeje, u përcoll edhe një urim i përzemërt për Anastas Muratin, për jetë të gjatë, shëndet dhe energji të pandalur në shërbim të çështjes dhe komunitetit shqiptar në Greqi.