Shoqata Rajonale e Futbollit Elbasan organizoi edhe këtë vit turneun tradicional “Kupa Dita e Verës”, një aktivitet që tashmë është kthyer në një nga ngjarjet më të dashura sportive për fëmijët në qytetin e Elbasanit. Turneu solli një atmosferë të veçantë sportive dhe festive, duke mbledhur së bashku të rinj, prindër dhe trajnerë në një ditë të mbushur me emocione dhe energji pozitive.
Ndeshjet u zhvilluan në ambientet e kompleksit sportiv “Shefqet Lamçja”, në kompleksin sportiv “Pepa” si dhe në stadiumin “Nexhip Trungu” në Cërrik. Për disa orë këto fusha u kthyen në qendra të vërteta të aktivitetit sportiv, ku fëmijët patën mundësinë të tregojnë talentin, pasionin dhe dashurinë për futbollin.
Dhjetëra fëmijë nga akademi dhe ekipe të ndryshme të rajonit morën pjesë në këtë turne, duke zhvilluar ndeshje plot ritëm dhe entuziazëm. Përtej rezultateve, ajo që dominoi gjatë gjithë aktivitetit ishte fryma e fair-play-t, gëzimi i lojës dhe mundësia që fëmijët të krijonin miqësi të reja përmes sportit.
Atmosfera u bë edhe më e veçantë nga prania e prindërve dhe familjarëve, të cilët ndoqën nga afër ndeshjet e fëmijëve të tyre dhe i mbështetën vazhdimisht nga tribunat, duke krijuar një ambient të ngrohtë dhe motivues për të vegjlit.
Në përfundim të turneut u zhvillua edhe ceremonia e ndarjes së trofeve për ekipet fituese sipas grupmoshave. Në kategorinë U-7 triumfoi FK Elbasani, ku morën pjesë gjithashtu AF Elbasani, Elite Sport 17 dhe Elbasani Junior. Në kategorinë U-9 fitues u shpall AF Elbasani, në një grup ku konkurruan edhe Elite Sport 17, AF Bajrami dhe Egnatia. Në kategorinë U-11 vendin e parë e siguroi ekipi Pepa, ndërsa pjesëmarrës ishin AF Elbasani, Pepa dhe Bajrami. Ndërkohë, në kategorinë U-13 fitues u shpall ekipi Kuqani, ku konkurruan edhe Turbina dhe Milan.
Trofeu për ekipet fituese u dorëzua nga përfaqësues të Shoqatës Rajonale të Futbollit Elbasan, kryetari Ilirjan File dhe drejtori teknik Eriol Merxha, të cilët përgëzuan të gjithë pjesëmarrësit për përkushtimin, pasionin dhe sportivitetin e treguar gjatë turneut.
Kupa “Dita e Verës” konfirmoi edhe një herë rëndësinë e organizimit të aktiviteteve sportive për fëmijët, duke u ofruar atyre një hapësirë ku mund të argëtohen, të zhvillojnë aftësitë e tyre dhe të hedhin hapat e parë në botën e futbollit. Për shumë prej tyre kjo ishte jo vetëm një garë sportive, por edhe një eksperiencë e bukur që do të mbetet gjatë në kujtesën e tyre.
