Ëndrra kuq e zi mund të bëhet realitet këtë verë. Për herë të parë në histori, tre skuadra shqiptare nga trevat e ndryshme – Shqipëria, Kosova dhe Maqedonia e Veriut – mund të jenë njëkohësisht pjesë e grupeve të kompeticioneve europiane. Një arritje që do të shënonte një moment historik jo vetëm për futbollin shqiptar, por edhe për gjithë hapësirën mbarëshqiptare.
KF Shkëndija e Tetovës është ekipi më i qetë. Kuqezinjtë tashmë kanë siguruar një biletë për në fazën e grupeve të Ligës së Konferencës. Por ambiciet nuk ndalen këtu: nëse eliminojnë kampionët e Bullgarisë, Ludogorets, atëherë Shkëndija do të ngjitet edhe më lart, duke luajtur në grupet e Ligës së Europës – një kompeticion më prestigjioz dhe me më shumë sfida ndërkombëtare.
FC Dinamo City, nën drejtimin e Ilir Dajës, ndodhet vetëm një hap larg historisë. Nëse skuadra kryeqytetase arrin të eliminojë polakët e Jagiellonia, atëherë siguron automatikisht një vend në grupet e Ligës së Konferencës. Për një klub që ka kaluar periudha të vështira e ringritjeje, ky do të ishte një kurorëzim i madh i punës së bërë në vitet e fundit.
Edhe Drita FC nga Gjilani e Zekirja Ramadanit ka një mundësi reale. Në letër, shorti duket më i favorshëm: Differdange 03 nga Luksemburgu është një kundërshtar i kalueshëm. Nëse arrihet kualifikimi në fazën “play-off” dhe më pas triumfi në këtë raund, atëherë edhe Drita do të sigurojë një vend në grupet e Ligës së Konferencës.
Një sukses i trefishtë do të ishte më shumë sesa sportiv: do të tregonte se futbolli shqiptar, pavarësisht ndarjeve gjeografike dhe administrative, po rritet me hapa të mëdhenj. Përballjet me skuadra të njohura europiane do të sillnin jo vetëm prestigj, por edhe të ardhura të mëdha financiare, zhvillim për klubet dhe mundësi të reja për futbollistët e rinj.
Nëse ky skenar bëhet realitet, stadiumet e Tetovës, Tiranës dhe Gjilanit do të gumëzhijnë nga emocionet, ndërsa zemra e çdo shqiptari do të rrahë njësoj fort për “skuadrat e kombit”.
albaniaexpress.al
