Këshilli i Lartë i Prokurorisë ka votuar këtë të martë për propozimin e SPAK-ut për kreun e ri të Byrosë Kombëtare të Hetimit. Me 11 vota pro dhe asnjë votë kundër, Joni Keta është emëruar drejtor i BKH-së për një mandat 5-vjeçar.
Mbledhja e KLP-së u zhvillua në prani të përfaqësuesve amerikanë, pjesë e misionit të asistencës për SPAK-un. Seanca nisi me debate mbi procedurën, pasi disa anëtarë ngritën diskutimin nëse duhej lexuar raporti i plotë i mbërritur nga SPAK-u apo një version i përmbledhur i tij.
Me 9 vota pro, u vendos që të lexohej raporti i përmbledhur i Këshillit dhe jo materiali bruto i ardhur nga SPAK-u.
Pas plotësimit të procedurave dhe shqyrtimit të materialeve, anëtarët e KLP-së miratuan unanimisht kandidaturën e Joni Ketës për drejtimin e Byrosë Kombëtare të Hetimit.