Elbasani është ndezur në dritë, ngjyra dhe gëzim, duke çelur zyrtarisht atmosferën e festave të fundvitit. Qyteti është veshur me dekor festiv, ndërsa dritat shumëngjyrëshe kanë krijuar një pamje magjike në çdo cep, duke sjellë emocion dhe buzëqeshje për të gjithë.
Në qendër të qytetit, fëmijët të veshur me kostume tradicionale të festave dhe veshje simbolike të Vitit të Ri sollën një koncert të ngrohtë festiv, duke përcjellë gëzim, muzikë dhe emocion për familjet elbasanase. Zërat e tyre mbushën sheshin me atmosferë feste dhe entuziazëm.
Moment kulmor ishte ndezja e dritave të pemës së fundvitit, e vendosur në zemër të qytetit, e cila simbolizon ardhjen e festave të Vitit të Ri dhe nisjen e një muaji të mbushur me aktivitete festive. Pamja e qytetit të ndriçuar, e shoqëruar me dekorin e bukur festiv, e ka kthyer Elbasanin në një hapësirë magjike për qytetarët dhe vizitorët.
Bashkia Elbasan ka përgatitur një kalendar të pasur aktivitetesh kulturore dhe festive që do të zhvillohen gjatë gjithë muajit Dhjetor. Nën kujdesin e Kryetarit të Bashkisë, festimet do të vijojnë deri më 31 dhjetor, me koncerte, aktivitete për fëmijë dhe surpriza për të gjitha grupmoshat.
Elbasani tashmë ka ndezur dritat e Dhjetorit dhe është gati të jetojë çdo ditë me ritmin, gëzimin dhe magjinë e festave të fundvitit.
