Një zjarr masiv që shpërtheu në një ndërtesë shumëkatëshe në Hong Kong ka shkaktuar tragjedinë më të rëndë të këtij lloji në qytet në më shumë se gjashtë dekada. Deri tani, të paktën 55 persona janë konfirmuar të vdekur, ndërsa 268 të tjerë rezultojnë ende të zhdukur. Pesëdhjetë e një viktima humbën jetën në vendngjarje, ndërsa katër të tjerë ndërruan jetë në spital. Mes viktimave është edhe një zjarrfikës.
Ky është zjarri më vdekjeprurës në Hong Kong që nga gushti i vitit 1962, kur një zjarr në lagjen Sham Shui Po mori po aq jetë. Tragjedia e fundit ndodhi në një zonë shumë të populluar të qytetit, ku flakët u përhapën me ritme të shpejta për shkak të sasisë së madhe të fishekzjarrëve të ruajtur në katet e sipërme të ndërtesës.
Sipas South China Morning Post, rreth 22.7 kg fishekzjarrë shkaktuan shpërthime të fuqishme, të cilat përhapën zjarrin në shumë kate të tjera, duke bllokuar dhjetëra persona dhe duke e vështirësuar ndërhyrjen e ekipeve të shpëtimit.
Kjo tragjedi i bashkohet serisë së zjarreve të rënda që kanë goditur Hong Kongun në të shkuarën. Në vitin 1996, një zjarr në ndërtesën Garley në Kowloon vrau 41 persona dhe plagosi 81 të tjerë, ndërsa në vitin 1948, shpërthimi i një depoje materiale të rrezikshme shkaktoi 176 viktima.
Autoritetet lokale janë në garë me kohën për të gjetur të mbijetuar, ndërsa ekipet e zjarrfikësve dhe mjekësore vazhdojnë të punojnë në kushte jashtëzakonisht të vështira për të vënë nën kontroll flakët dhe për të ofruar ndihmën e nevojshme.