Në kuadër të Javës Globale të Sipërmarrjes, Fakulteti i Biznesit dhe i Drejtësisë në Universitetin “Aleksandër Xhuvani” të Elbasanit, në bashkëpunim me Agjencinë Startup Albania, organizoi një aktivitet të dedikuar studentëve, si pjesë e një fushate ndërkombëtare që zhvillohet në dhjetëra vende të botës dhe mbledh rreth 10 milionë pjesëmarrës çdo vit.
Aktiviteti, i cili u zhvillua në ambientet e fakultetit, synoi të afrojë të rinjtë me botën e sipërmarrjes moderne, të teknologjisë dhe inovacionit, duke i inkurajuar ata të ndërtojnë ide të reja dhe të eksplorojnë mundësitë që ofron ekosistemi shqiptar i startup-eve.
Dekani Cerri: “Angazhimi ynë është të forcojmë lidhjet me biznesin dhe të nxisim inovacionin”
Në fjalën e tij përshëndetëse, Dekani i Fakultetit të Biznesit dhe të Drejtësisë, Prof. Asoc. Dr. Shpëtim Cerri, vlerësoi rëndësinë e këtij aktiviteti në zhvillimin profesional të studentëve dhe në rritjen e ndërgjegjësimit për rolin e sipërmarrjes në ekonominë moderne.
“Fakulteti ynë vijon të angazhohet në forcimin e partneriteteve me bizneset, integrimin e teknologjive të reja në programet tona mësimore, nxitjen e projekteve të studentëve dhe krijimin e hapësirave të dedikuara inovacionit dhe punës krijuese”, u shpreh Cerri, duke theksuar se universiteti është i përkushtuar të jetë një pikë referimi për të rinjtë që dëshirojnë të ndërmarrin nisma të reja profesionale.
Startup-et, investitorët dhe rritja e ideve të reja
Pjesë e aktivitetit ishin edhe prezantimet e znj. Helena Habdija dhe znj. Oriana Koçibelli, të cilat sollën për studentët një panoramë të qartë të procesit të ngritjes së një startup-i, nga faza fillestare deri te rritja dhe shkallëzimi i tij.
Ato theksuan rolin vendimtar të investitorëve në suksesin e një sipërmarrjeje të re, rëndësinë e përgatitjes së ideve të strukturuara, si dhe kërkesat reale të tregut shqiptar dhe atij ndërkombëtar. Duke ndarë përvoja konkrete, ato i inkurajuan studentët të eksplorojnë mundësitë që ofrojnë fondet, platformat dhe programet e mbështetjes për startup-et.
Një mundësi e re për studentët elbasanas
Aktiviteti u prit me interes të lartë nga studentët e Fakultetit të Biznesit dhe të Drejtësisë, të cilët u angazhuan me pyetje, diskutime dhe ide mbi hapat e parë të sipërmarrjes. Organizatorët bënë të ditur se në vijim priten edhe iniciativa të tjera të dedikuara inovacionit dhe krijimit të një ekosistemi të qëndrueshëm startup-esh brenda universitetit.
Ky aktivitet shënon një tjetër hap të rëndësishëm drejt afrimit të të rinjve me praktikat moderne të sipërmarrjes, duke forcuar rolin e Universitetit të Elbasanit si një qendër që mbështet talentin, kreativitetin dhe vizionin e studentëve.
