Nga Fatmir Popja
Star Campers Albania është shpallur fituese e Çmimit të Inovacionit në edicionin e katërt të Butterfly Award, një event rajonal i organizuar nga Regional Cooperation Council (RCC) dhe i mbështetur nga Bashkimi Europian.
Ky vlerësim i rëndësishëm i atribuohet kontributit të tyre në zhvillimin e astroturizmit në Shqipëri, një fushë krejtësisht e re dhe ende e pashfrytëzuar në vend.
Kompania e themeluar dhe drejtuar nga librazhdasi Lyto Alliu një nga guidat më të njohura turistike në Shqipëri dhe jo vetëm është veçuar për organizimin e eventeve stargazing, netëve nën yje dhe aktiviteteve edukative që lidhin turistët me natyrën dhe fenomenet qiellore.
Star Campers Albania mbetet subjekti i vetëm në Shqipëri që ofron këto lloj përvojash të strukturuara dhe profesionale, duke sjellë një dimension të ri turizmit alternativ.
Ky çmim sipas Lyto Alliut konsiderohet një hap i madh përpara për promovimin e Shqipërisë si destinacion që ofron eksperienca unike në natyrë.
Me pesë vite aktivitet në tregun shqiptar, kompania shprehet se është më e motivuar se kurrë për të zgjeruar ofertën dhe për ta zhvilluar këtë sektor në nivele edhe më profesionale.
Star Campers Albania falënderon organizatorët dhe thekson se ky vlerësim forcon dëshirën e tyre për të vazhduar inovacionin dhe për të sjellë përvoja gjithnjë e më të veçanta nën qiellin shqiptar.
