Ministrja e Punëve të Brendshme, Albana Kociu, së bashku me ekipet e Agjencisë Kombëtare të Mbrojtjes Civile, ishin sot në terren në fshatin Xhyrë, Njësia Administrative Hotolisht, Bashkia Librazhd, ku reshjet intensive të ditëve të fundit kanë shkaktuar dëmtime serioze në urën mbi lumin Shkumbin, duke sjellë ndërprerjen e përkohshme të qarkullimit në këtë segment të rëndësishëm.
Që në orët e para të ditës, në bashkërendim me strukturat vendore dhe institucionet përgjegjëse, po zhvillohen punime intensive me qëllim garantimin e sigurisë së banorëve dhe vendosjen e një zgjidhjeje të përkohshme për aksesin, deri në rikthimin e plotë të lëvizjes në urën e dëmtuar.
Aktualisht, qarkullimi i mjeteve është devijuar nëpërmjet një rruge alternative, e cila është mjaft e gjatë, ndërsa inxhinierët dhe specialistët e terrenit po vlerësojnë dëmet dhe po punojnë për stabilizimin e situatës.
Ministrja Kociu ka theksuar se prioritet mbetet siguria e qytetarëve dhe garantimi i një zgjidhjeje sa më të shpejtë për rikthimin e normalitetit në zonë.
