Në qytetin e Elbasanit ka nisur sot Kampionati i Shkollave të Mesme në volejboll për vajza dhe djem, i organizuar nga Bashkia Elbasan, Klubi Shumësportësh dhe ZVA Elbasan.
Ky aktivitet ka për qëllim rritjen e përfshirjes së të rinjve në sport dhe krijimin e një kalendari të rregullt garash mes shkollave të mesme të qytetit, duke i dhënë hapësirë zhvillimit të talenteve dhe aktivitetit fizik në mjedisin shkollor.
Tek vajzat, ndeshja hapëse zhvilluar mes shkollës “Kostandin Kristoforidhi” dhe “Vasil Kamami” u karakterizua nga lojë e disiplinuar dhe ritme të qëndrueshme. Skuadra e “Kostandin Kristoforidhit” arriti të marrë kontrollin e lojës që në setin e parë dhe e mbylli ndeshjen me rezultatin 2–0, duke siguruar pikët e para në tabelë.
Në kategorinë e djemve, takimi i ditës vuri përballë ekipet e “Kostandin Kristoforidhit” dhe “Onufrit”. Loja u zhvillua me ritëm të lartë dhe me përpjekje të vazhdueshme të të dyja skuadrave për të ruajtur balancën. Megjithatë, “Kostandin Kristoforidhi” arriti të menaxhojë më mirë fazat kyçe të ndeshjes dhe e mbylli sfidën me fitoren 2–0. Ky rezultat e vendos ekipin në një pozicion të favorshëm që në javën e parë të kampionatit.
Aktiviteti pritet të vijojë në ditët në vijim me ndeshje të tjera mes shkollave pjesëmarrëse, duke krijuar një atmosferë dinamike sportive dhe duke i dhënë mundësi më shumë nxënësve të përfshihen në garë.
