Presidenti ukrainas Volodymyr Zelensky u takua të hënën me presidentin francez Emmanuel Macron në një bazë ajrore pranë Parisit, ku të dy udhëheqësit nënshkruan një marrëveshje të rëndësishme për blerjen e pajisjeve të avancuara franceze të mbrojtjes ajrore, përfshirë avionët luftarakë Rafale – krenaria e forcave ajrore franceze.
Macron njoftoi para gazetarëve se palët kanë firmosur një letër qëllimi që i mundëson Kievit të blejë deri në 100 avionë Rafale së bashku me armatimin e tyre përkatës.
Marrëveshja shënon një nxitje të madhe për Ukrainën në përballjen me agresionin rus, pasi parashikon gjithashtu mundësinë e blerjes së sistemit të ri të mbrojtjes ajrore SAMP-T, i cili ndodhet ende në fazë zhvillimi, si edhe sisteme të avancuara radarësh dhe dronë.
Nga baza ajrore Villacoublay, Macron deklaroi se kjo marrëveshje do të forcojë ndjeshëm kapacitetet mbrojtëse të Ukrainës kundrejt “sulmeve të papranueshme të Rusisë”, duke theksuar se Moskë “varet gjithnjë e më shumë nga lufta”.
Sipas tij, objektivi i këtij bashkëpunimi është të vërë “përsosmërinë industriale dhe teknologjike të Francës në shërbim të Ukrainës dhe, në mënyrë të tërthortë, të gjithë Evropës”.