Sipas një raportimi të “Daily Mail”, Rusia ka prezantuar një armë të re bërthamore, e cila po përshkruhet nga ekspertët ndërkombëtarë si një nga më të frikshmet e zhvilluara ndonjëherë nga Moska. Arma, e quajtur “Poseidon”, është një super-torpedë me energji dhe ngarkesë bërthamore, me aftësi teorike për të zhytur brigjet amerikane nën ujëra të kontaminuara radioaktive.
Burimet perëndimore thonë se “Poseidon” është projektuar të operojë në thellësi shumë të mëdha, duke shmangur kështu radarët dhe mbrojtjen detare. Goditja e saj në det të hapur ose pranë bregut mund të shkaktojë cuname gjigante, të afta të shpërbëjnë infrastrukturën dhe të kthejnë zonat e prekura në territore të pabanueshme për një kohë të gjatë.
Raporti thekson se një shpërthim pranë brigjeve të SHBA-ve do të mund të kishte pasoja katastrofike, deri në zhytjen e qyteteve si Manhattani nën ujëra të helmuara me rrezatim.
Publikimi i këtyre detajeve ka ngritur shqetësim në Uashington, i cili është detyruar të rivlerësojë balancën strategjike dhe mbrojtjen bërthamore. Nga ana tjetër, Moska e përshkruan “Poseidon”-in si një armë parandalimi që synon të ruajë ekuilibrin ushtarak, ndërsa vendet perëndimore e konsiderojnë atë një kërcënim të drejtpërdrejtë ndaj sigurisë globale.