Presidentja e Kosovës, Vjosa Osmani, ka thirrur për të premten një takim me kryetarët e partive politike, në kohën kur vendi ende mbetet pa qeveri të re, gati nëntë muaj pas mbajtjes së zgjedhjeve të fundit parlamentare.
Këshilltari i presidentes, Bekim Kupina, konfirmoi për Radion Evropa e Lirë se takimi do të zhvillohet nesër në orën 12:00. Ky takim pritet të shërbejë si konsultim për hapat e mëtejshëm, pasi i mandatuari i parë për formimin e qeverisë, Albin Kurti nga Lëvizja Vetëvendosje – fituesja e zgjedhjeve – nuk arriti të sigurojë votat e nevojshme në Kuvend të dielën.
Në bazë të Kushtetutës, Presidentja Osmani duhet të caktojë një mandatar të dytë brenda 10 ditëve nga dështimi i mandatit të parë. Por, situata politike mbetet e komplikuar. Pasi partitë kryesore vazhdojnë të kenë qëndrime të largëta dhe mungon vullneti për arritjen e një marrëveshjeje për koalicion qeverisës, nuk është e sigurt nëse do të ketë një kandidat tjetër për kryeministër.
Takimi i së premtes mund të jetë vendimtar për të përcaktuar nëse vendi do të ecë drejt formimit të qeverisë, apo në një skenar tjetër politik.