Më 25 tetor 1917 u çelën dyert e Liceut Kombëtar të Korçës, i njohur ndryshe si “Liceu Francez”. Në atë kohë, Korça funksiononte si një “Republikë autonome”, administrohej nga vendasit, por nën mbrojtjen e autoriteteve ushtarake franceze. Administrata e re shqiptare, e vendosur në krye të krahinës autonome, i kushtoi vëmendje të veçantë çështjeve arsimore.
Veprimtaria e Liceut Kombëtar të Korçës vazhdoi deri në periudhën e parapushtimit italian në vitin 1939. Rrugëtimi i këtij liceu kaloi përmes sfidave të kohës, duke luajtur një rol të rëndësishëm në arsimimin e të rinjve nga mbarë vendi, edhe pse u shoqërua me vështirësi pas Luftës së Parë Botërore.
Sot është ngritur një grup pune i cili po punon për projektin e rihapjes së Liceut Francez në Korçë. Deri tani janë zhvilluar disa takime të Komitetit Pilotues për bashkëpunim mes institucioneve qendrore e vendore, me mbështetjen e ekspertit të qeverisë franceze.
Ky projekt është vazhdimësi e traditës së miqësisë së mirë mes Shqipërisë dhe Francës, dhe synon të ofrojë një perspektivë të re arsimore për të rinjtë e qarkut të Korçës dhe më gjerë.