Gjirokastra është një ndalesë e përhershme për turistët vendas dhe të huaj që zgjedhin të vizitojnë Shqipërinë.
Falë vlerave historike dhe arkitektonike që mbart ky qytet si dhe kështjella e tij, vizitorët vendas e të huaj e konsiderojnë atë si destinacionin më të preferuar për të qenë në listën e vendeve për t’u parë.
“E diela në sokakët gumëzhues prej turistëve që shijojnë vjeshtën gjirokastrite”, shkroi sot ministrja e Arsimit, Mirela Kumbaro, e cila ndau pamje të turistëve të shumtë që vizitojnë qytetin e gurtë.
Vizitorë vendas dhe të huaj që ecin mbi gurët shekullorë, grupe turistike që vizitojnë dhe prijnë drejt historisë, aparate që shkrepin kujtime, kjo është pamja që ofron qyteti mijëravjeçar.
Panorama nga kalaja e Gjirokastrës është një pamje që ngjall kureshtje te vizitorët, të interesuar për historinë dhe kulturën që ky qytet mbart.
Gjirokastra, apo siç njihet ndryshe “qyteti i gurtë”, është ndër qytetet më të bukura në jug të Shqipërisë. Me vlera të shumëfishta që ka, ky qytet-muze është pranuar ndër të parët qytete në UNESCO. Simboli kryesor i qytetit është Kalaja. Ajo është e vendosur mbi një kodër pak të shkëputur nga Mali i Gjerë, e ngritur në një pikë vrojtuese rreth 370 m mbi nivelin e detit.