Rektorja e Universitetit të Elbasanit “Aleksandër Xhuvani”, Prof. Dr. Elvira Fetahu, zhvilloi së fundmi një takim zyrtar me z. Klevis Qose, Drejtor i Përgjithshëm i Burgjeve, dhe znj. Alma Tandili, Kryetare e Agjencisë Shtetërore të Ndihmës dhe Mbrojtjes Sociale (ASHDMF). Ky takim shënon një hap të rëndësishëm drejt forcimit të lidhjeve ndërmjet arsimit të lartë dhe institucioneve shtetërore.
Gjatë takimit u diskutua finalizimi i një marrëveshjeje bashkëpunimi që synon të krijojë mundësi konkrete për përfshirjen e studentëve në fusha me ndikim të drejtpërdrejtë shoqëror dhe profesional. Marrëveshja përfshin:
- zhvillimin e praktikave profesionale për studentët, duke u ofruar atyre përvoja reale në ambientet institucionale;
- angazhimin e studentëve në projekte dhe programe që kontribuojnë në mirëqenien dhe zhvillimin social;
- nxitjen e bashkëpunimit akademik dhe profesional përmes hulumtimeve të përbashkëta dhe shkëmbimit të ekspertizës;
- organizimin e trajnimeve për stafin dhe promovimin e zhvillimit institucional përmes ndërveprimit të ndërsjellë.
Prof. Dr. Elvira Fetahu vlerësoi rëndësinë e këtij bashkëpunimi, duke theksuar se ai përfaqëson një angazhim të qartë të universitetit për t’i afruar studentët me realitetin e tregut të punës dhe për të rritur kontributin e tyre në komunitet. Sipas saj, krijimi i këtyre urave bashkëpunimi ndihmon jo vetëm në përgatitjen profesionale të studentëve, por edhe në formimin e tyre si qytetarë aktivë dhe të ndërgjegjshëm për rolin e tyre në shoqëri.
Ky bashkëpunim pritet të sjellë përfitime të ndërsjella, duke e shndërruar universitetin në një aktor aktiv në fushën e zhvillimit social dhe profesional në vend.
