Prokuroria Themelore në Pejë ka nisur hetimet pas pretendimeve se në rundin e parë të zgjedhjeve lokale më 12 tetor në Junik votuan persona që nuk janë banorë të komunës. Hetimi fokusohet nëse ka elemente të veprës penale, përfshirë keqpërdorimin e detyrës zyrtare.
Zëdhënësi i Prokurorisë, Shkodran Nikqi, tha se rasti është deleguar te Departamenti i krimeve të rënda për veprime të mëtejme.
Deputeti Daut Haradinaj ka kërkuar publikimin e listës zgjedhore, duke e konsideruar situatën si një “skemë të dominimit numerik”.
Në rundin e parë votuan 2.490 nga 4.846 persona të regjistruar. Pa numëruar votat me kusht, të diasporës dhe të personave me nevoja të veçanta, diferenca mes dy kandidatëve që do të përballen në balotazh është e vogël: Ruzhdi Shehu (LDK) ka 180 vota më shumë se Agron Kuçi (AAK).