Në seancën plenare të sotme, Besnik Brahimi dhe Shkurt Lasku, kandidatë të Partisë Socialdemokrate (PSD) në qarkun e Shkodrës, bënë betimin si deputetë të rinj të Kuvendit të Shqipërisë.
Kryetari i Kuvendit, Niko Peleshi, njoftoi gjatë seancës se Komisioni Qendror i Zgjedhjeve (KQZ) ka depozituar vendimet për dhënien e mandatit të dy kandidatëve të listës shumemërore të PSD-së, pas dorëheqjes nga mandati të Tom Doshit dhe Sabina Jorgos.
“Sot është mbledhur Këshilli për Rregulloren, Mandatet dhe Imunitetin për të verifikuar mandatet e deputetëve të rinj të zgjedhur nga KQZ,” deklaroi Peleshi.
Raportin përkatës e paraqiti deputeti Bledar Çomo, në emër të Këshillit për Rregulloren, Mandatet dhe Imunitetin, i cili konfirmoi vlefshmërinë e mandateve për dy deputetët e rinj. Pas kësaj procedure formale, Brahimi dhe Lasku bënë betimin në sallën plenare, duke marrë zyrtarisht detyrën e tyre parlamentare.