Nga Etleva Rrapa
Shqipëria ka shënuar një moment historik në skenën ndërkombëtare të sektorit detar duke marrë pjesë për herë të parë në World Marinas Conference, organizuar nga ICOMIA – Shoqata Ndërkombëtare e Industrisë së Marinës, pas 58 vitesh nga themelimi i saj.
Konferenca u zhvillua në një nga vendet më ikonike të botës detare, në ambientet prestigjioze të Arsenale di Venezia, një simbol i fuqisë detare historike të Republikës së vjetër të Venecias. Pjesëmarrja e Shqipërisë në këtë ngjarje të rëndësishme vjen në një moment vendimtar për të ardhmen e industrisë së turizmit detar në vend.
Shqipëria u përfaqësua në këtë forum nga Monika Micheli Panozzo, themeluese dhe drejtoreshë e Balkans Sea Fair, panairi të parë dedikuar industrisë detare në Shqipëri, si dhe nga Cristian Marine, kompani shqiptare e përfaqësuar nga bashkëthemeluesi dhe pronari Gëzim Salillari.
Balkans Sea Fair, një aktivitet i organizuar në Marina di Orikum, ka shërbyer si pikënisje për promovimin e potencialit të Shqipërisë në sektorin e marinave turistike dhe të shërbimeve detare.
Përfaqësuesit shqiptarë morën një vëmendje të veçantë nga organizatorët gjatë koktejit të mirëseardhjes, i cili u mbajt në mjediset mbresëlënëse të Pallatit Dukal të Venecias, duke theksuar rëndësinë e këtij debutimi për Shqipërinë. Organizatorët e konferencës e vlerësuan pjesëmarrjen e vendit tonë si një hap domethënës në integrimin e Shqipërisë në rrjetin global të marinave turistike.
Konferenca botërore e marinave është një platformë ndërkombëtare ku mblidhen profesionistë, investitorë dhe përfaqësues të industrisë detare nga e gjithë bota për të diskutuar risitë, sfidat dhe zhvillimet më të fundit në fushën e marinave – që nga infrastruktura dhe teknologjitë e qëndrueshme e deri tek menaxhimi i porteve turistike.
Pjesëmarrja e Shqipërisë në këtë event vjen në një kohë kur qeveria shqiptare po fokusohet intensivisht në zhvillimin e sektorit detar dhe në ndërtimin e marinave turistike përgjatë bregdetit shqiptar si pjesë e strategjisë për të rritur turizmin elitar dhe investimet e huaja në këtë fushë.
Kjo prani e parë në një konferencë kaq të rëndësishme pritet të shërbejë si trampolinë për më shumë bashkëpunime ndërkombëtare, për promovimin e bregdetit shqiptar si destinacion detar premium në Mesdhe dhe për forcimin e rolit të Shqipërisë në hartën globale të marinave.
