Ekspertë të shëndetit publik, mjekë, prodhues dhe politikëbërës nga e gjithë Evropa u mblodhën në Samitin e 8-të të Reduktimit të Dëmit nga Duhani, zhvilluar në Athinë.
Për dy ditë me radhë, ata diskutuan mbi nevojën urgjente për qasje të reja dhe shkencore për të luftuar epideminë globale të duhanpirjes, e cila shkakton rreth 7 milionë viktima çdo vit.
I pranishëm në këtë samit, Dr. Stelios Kympouropoulos, eurodeputet dhe mjek psikiatër, theksoi se reduktimi i dëmit është një detyrë, kur ekzistojnë alternativa më të sigurta dhe të rregulluara ndaj duhanit tradicional.
“Nevojiten politika humane, proporcionale dhe të bazuara në evidenca për të ndihmuar të rriturit të ulin rrezikun,” – deklaroi ai.
Studimet tregojnë se personat me çrregullime depresive, ankth apo psikoza kanë më shumë gjasa të pinë duhan. Lënia e tij ndikon pozitivisht jo vetëm në shëndetin fizik, por edhe në humor, gjumë, energji dhe produktivitet.
Ekspertët theksuan se produktet pa tym, si pajisjet e avullimit apo produktet me ngrohje, kanë rrezik dukshëm më të ulët se cigaret tradicionale – megjithëse jo zero.
Shembujt e Suedisë, Mbretërisë së Bashkuar dhe Zelandës së Re tregojnë se konsumimi i duhanit bie më shpejt kur ekzistojnë alternativa të rregulluara dhe të kontrolluara.
Për të reduktuar dëmet nga duhani dhe për të ndërtuar politika të qëndrueshme në BE, Dr. Kympouropoulos propozoi pesë hapa kryesorë:
- Ndarja e qartë midis produkteve me djegie dhe atyre pa tym;
- Diferencimi i taksave për të nxitur lënien e duhanit;
- Monitorim i vazhdueshëm i produkteve;
- Përfshirja e mjekëve në procesin e udhëzimeve;
- Zbatimi i rregullave etike për mbrojtjen e të rinjve.
Në përfundim, ai nënvizoi se produktet alternative janë dukshëm më pak të dëmshme, por kërkojnë rregulla të forta për të parandaluar përdorimin nga të rinjtë.
