Në Kosovë po zhvillohen sot zgjedhjet lokale për kryetarë komunash dhe përfaqësues në kuvendet komunale. Të drejtë vote kanë 2 milionë e 69 mijë e 98 qytetarë brenda vendit, ndërsa rreth 44 mijë votues janë regjistruar për të votuar nga jashtë.
Institucionet e Kosovës dhe misionet ndërkombëtare kanë bërë apel për një proces të qetë, duke u kërkuar qytetarëve të votojnë lirshëm dhe pa ndikime të jashtme.
Sipas Komisionit Qendror të Zgjedhjeve, për këto zgjedhje janë certifikuar 5.626 kandidatë, mes tyre 206 për kryetarë komunash, ndërsa pjesa tjetër garon për ulëse në kuvendet komunale.
Në garë marrin pjesë 93 subjekte politike, përfshirë 32 parti, 32 iniciativa qytetare, 2 koalicione dhe 27 kandidatë të pavarur.
Votuesit duhet të plotësojnë dy fletëvotime në kabinën e votimit — njërën për kryetarin e komunës dhe tjetrën për kandidatin e kuvendit komunal, duke shënuar numrin përkatës të kandidatit dhe subjektit politik.