Rreth orës 14:00 të ditës së sotme, në periferi të qytetit të Cerrikut, në zonën e njohur si “Kodra e Beut”, është shfaqur një vatër zjarri në rrethana ende të paqarta e cila është përhapur me shpejtësi duke përfshirë një sipërfaqe të konsiderueshme toke.
Sipas informacioneve paraprake, flakët gjigante kanë djegur të paktën 5 hektarë me ullishte, masive të ndryshme frutore dhe shkurre, duke shkaktuar dëme të mëdha në sipërfaqe të kultivuara nga banorët e zonës.
Zjarrfikësit janë përfshirë menjëherë në aksion për të vënë nën kontroll situatën, ndërsa përpjekjet janë përqendruar edhe në mbrojtjen e varrezave publike të Cerrikut, të cilat janë rrezikuar seriozisht nga përhapja e flakëve.
Në këtë zonë ndodhen qindra drurë dekorativë, që përbëjnë jo vetëm një element estetik, por edhe një trashëgimi mjedisore për qytetin.Shkaqet e zjarrit mbeten ende të paqarta dhe autoritetet kanë nisur hetimet për të zbuluar nëse bëhet fjalë për ndonjë faktor natyror apo ndërhyrje njerëzore.
Rreth orës 16:30 situtaa është vënë plotësisht nën kontroll dhe po mbahet në monitorim sepse egziston rreziku i riaktivizimit në disa zona pasi mbizotërojnë temperaturat e larta.