Ekipet e punës kanë përfunduar evidentimin e dëmeve të shkaktuara nga zjarri i 11 Gushtit, i cili preku njësinë Skënderbegas në Gramsh. Sipas të dhënave, 68 banesa janë dëmtuar: 10 prej tyre totalisht për rindërtim të plotë, 16 për rikonstruksion të pjesshëm dhe 42 shtëpi sezonale ose të pabanueshme.
Në këto statistika përfshihen edhe pajisjet elektroshtëpiake dhe mobiljet e banorëve të prekur. Për shkak të zjarrit, ngordhën 215 bagëti të imta, 9 gjedh dhe 7 njëthundrakë.
Zjarri shkrumboi gjithashtu 44.045 hektarë ullinj, 11.028 hektarë rrush, 1.451 hektarë bimë medicinale dhe 9,5 hektarë pemë frutore dhe arrorë. Për pyjet, sipërfaqja e prekur do të verifikohet nëpërmjet pamjeve satelitore.
Faza e dytë përfshin përllogaritjen financiare të dëmeve, ndërsa bashkitë e qarkut dhe qeveria shqiptare kanë nisur miratimin e fondeve ndihmëse. Shumë donatorë kanë shprehur solidaritet me banorët e Skënderbegasit në këtë moment të vështirë.
