Kryebashkiaku i Tiranës, Erion Veliaj, i cili ndodhet në qeli që prej muajit shkurt, ka ankimuar në Gjykatën e Posaçme një vendim të SPAK që refuzoi kërkesën e tij për të takuar avokatët e huaj, me qëllim përgatitjen e procedurës para Gjykatës së Strasburgut.
Veliaj u arrestua më 10 shkurt në zyrën e Bashkisë, si i dyshuar për veprat penale:
- “Korrupsioni pasiv i funksionarëve të lartë shtetërorë ose i të zgjedhurve vendorë” (në bashkëpunim, 9 herë),
- “Pastrimi i produkteve të veprës penale ose veprimtarisë kriminale”.
Bashkëshortja e tij, Ajola Xoxa, është lënë në masë sigurimi “detyrim paraqitje”.
Sipas SPAK, të dhënat e mbledhura deri tani tregojnë se Veliaj dhe bashkëshortja e tij kanë krijuar një mekanizëm që ka mundësuar përfitime të parregullta nga fondet publike të Bashkisë Tiranë, për pasurimin personal të tyre, përmes veprimeve të kamufluara dhe të kundërligjshme.