SHBA ,2 korrik 2026/Albania Express News/-Presidenti i SHBA-së, Donald Trump, ka kryer fluturimin e parë zyrtar me avionin e ri presidencial Air Force One, një Boeing 747 me vlerë rreth 400 milionë dollarë, i dhuruar Shteteve të Bashkuara nga familja mbretërore e Katarit.
Avioni u përdor për herë të parë gjatë udhëtimit të Trump në Dakotën e Veriut, ku ai mori pjesë në inaugurimin e një muzeu kushtuar ish-presidentit amerikan Theodore Roosevelt.
Pamjet e publikuara nga stafi i Shtëpisë së Bardhë tregojnë ambientet luksoze të avionit, i cilësuar si një “pallat fluturues”. Në bord ndodhen zyra moderne, sallë mbledhjesh, bibliotekë, ulëse që shtrihen plotësisht, funksion masazhi dhe sisteme argëtimi individuale për çdo pasagjer.
Megjithatë, avioni ka qenë objekt polemikash që nga njoftimi i dhurimit. Ligjvënës demokratë kanë ngritur shqetësime për çështje sigurie dhe etike, ndërsa kanë vlerësuar se përshtatja e tij sipas standardeve të Air Force One mund të kushtojë mbi 1 miliard dollarë.
Trump i ka hedhur poshtë kritikat, duke e cilësuar avionin si “më të mirin e ndërtuar ndonjëherë” dhe duke argumentuar se pranimi i tij kursen para për taksapaguesit amerikanë krahasuar me ndërtimin e një avioni të ri nga e para.
Sipas autoriteteve amerikane, avioni është pajisur me të gjitha sistemet e nevojshme të sigurisë përpara se të hynte në shërbim dhe pritet të përdoret edhe në udhëtimet e ardhshme të presidentit, përfshirë samitin e NATO-s në Turqi dhe vizitën në Kinë në muajin nëntor.
