Pas triumfit minimal 1-0 ndaj Letonisë në “Arenën Kombëtare”, trajneri i Kombëtares shqiptare, Sylvinho, ndau emocionet dhe analizën e tij për ndeshjen për mikrofonin e DigitAlb.
Vlerësimi i ndeshjes
“Fituam një garë shumë të vështirë. Letonia luajti tre ditë më parë një ndeshje të ngjashme ndaj Serbisë, që mund të kishte dalë edhe barazim. Kundërshtar fizikisht i fortë; nëse nuk shënon golin e sigurisë, mund të rrezikosh shumë,” tha tekniku brazilian.
Ai theksoi se ndryshimet taktike, si futja e Bajramit në formacion, ishin vendimtare: “Bajrami është një lojtar hibrid, depërton në zona dhe sjell fleksibilitet në lojë. I jap merita ekipit kundërshtar për disa situata të krijuara.”
Broja krahasohet me yjet botërorë
Sylvinho komentoi edhe performancën e Brojës: “Në pjesën e dytë ka pasur hapësira dhe kundërsulme të mira. Në Kombëtare ke mundësi të luash 6-7 herë në vit, ndaj minuta e tij është e kufizuar. Stili i tij është i ngjashëm me Mbappe, Vinicius dhe Henry. Nuk është një ‘9’ tipik; shfrytëzon shumë mirë hapësirat dhe mund të depërtojë.”
Lojtarët dhe e ardhmja
Trajneri shprehu krenarinë për skuadrën: “Jam shumë krenar për lojtarët e mi dhe dhomat e zhveshjes. E kemi parë ndeshjen e kaluar Letoni-Serbi dhe nuk mund të them se e kam në mendje ndeshjen e sotme. Në ditët e tjera do të fillojë puna për ndeshjen e tetorit.”
Ai vlerësoi edhe Asllanin dhe Bajramin: “Asllani është një djalë shumë i mirë, ka bërë një rrugëtim të shkëlqyer me Kombëtaren në Europian dhe kualifikues. Jam shumë i lumtur për Bajramin. Të dy punojnë shumë fort dhe jam i lumtur me të gjithë lojtarët.”