Tirana do të jetë qendra e një prej ngjarjeve më të rëndësishme ekonomike të rajonit, teksa më 13 dhe 14 tetor do të mirëpresë Forumin e Investimeve EU–WB6 (Bashkimi Europian – Ballkani Perëndimor).
Lajmin e bëri të ditur kryeministri Edi Rama, i cili në një postim në rrjete sociale e cilësoi këtë forum si një “ngjarje historike” që do të bashkojë në kryeqytetin shqiptar vendet e Ballkanit Perëndimor, përfaqësuesit e lartë të Bashkimit Europian dhe investitorë nga e gjithë bota.
“Tirana mirëpret më 13–14 tetor Forumin e Investimeve EU–WB6, një ngjarje historike që bashkon vendet e Ballkanit Perëndimor, vendimmarrësit e Bashkimit Europian dhe investitorë nga e gjithë bota. Një tjetër hap i rëndësishëm për forcimin e bashkëpunimit dhe zhvillimit ekonomik në rajon”, – shkroi Rama.
Ky forum pritet të shërbejë si një platformë strategjike për tërheqjen e investimeve dhe për thellimin e integrimit ekonomik midis Bashkimit Europian dhe gjashtë vendeve të Ballkanit Perëndimor.