Ky është 14-vjeçari Alket Zeqollari nga Pogradeci. Ndryshe nga bashkëmoshatarët e tij që internetin e shfrytëzojnë për rrjete sociale, TikTok apo Snapchat, ai ka punuar dhe studiuar fort për t’i marrë teknologjisë më të mirën e saj dhe për të krijuar pajisje me funksione të caktuara.
Së fundi, Alketi ka ndërtuar një radar që arrin, përmes valëve, të detektojë objekte dhe njerëz. Sipas tij, ky radar – që aktualisht është vetëm një prototip – mund të japë në kohë reale çdo person të panjohur që mund t’i afrohet banesave apo institucioneve.
14-vjeçari i apasionuar pas programeve të kodimit thotë se tashmë ka filluar punën për ta shndërruar prototipin e radarit në një pajisje funksionale, me kosto personale, duke planifikuar që së shpejti të ketë edhe aplikacionin e tij.
Si Alketi, në shkolla ka edhe shumë vajza e djem të tjerë që punojnë me programe kodimi dhe krijojnë pajisje. Megjithatë, ende në vendin tonë mungon mbështetja reale nga Ministria e Arsimit apo ajo e Inovacionit për të zhvilluar më tej këto ide, duke u mundësuar të rinjve përdorimin e teknologjisë në formën e duhur.