Në ambientet e Institucionit të Prefektit të Qarkut Elbasan u zhvillua një takim pune me përfaqësues të Inspektoratit Shtetëror për Mbikëqyrjen e Tregut (ISHMT), me fokus kryesor procesin e regjistrimit dhe kontrollit të ashensorëve në përdorim, në përputhje me kuadrin ligjor në fuqi.
Takimi u drejtua nga Prefekti Ilir Bejtja, i cili theksoi rëndësinë e respektimit të standardeve të sigurisë për pajisjet ngritëse dhe nevojën që të gjitha subjektet që operojnë me këto pajisje të jenë të informuara dhe të përgjegjshme ndaj detyrimeve ligjore.
Pjesëmarrësit diskutuan mbi procedurat konkrete të regjistrimit, sfidat e evidentuara gjatë kontrolleve në terren dhe përgjegjësitë që u takojnë operatorëve privatë, por edhe institucioneve publike. U theksua gjithashtu domosdoshmëria e bashkëpunimit ndërinstitucional për të garantuar sigurinë maksimale të qytetarëve.
Ky takim u cilësua si një hap i rëndësishëm drejt ndërgjegjësimit më të madh dhe rritjes së nivelit të zbatimit të ligjit në këtë fushë, duke synuar mbrojtjen e jetës dhe shëndetit të përdoruesve të ashensorëve në të gjithë territorin e qarkut.
albaniaexpress.al