Në kuadër të Javës Globale të Sipërmarrjes, deputetja socialiste e Elbasanit, Sara Mila, zhvilloi një takim të posaçëm me gratë sipërmarrëse të qytetit, një aktivitet që u kthye në një platformë të vërtetë diskutimi, ndarje përvojash dhe ndërtimi vizionesh të përbashkëta.
Takimi, i organizuar në bashkëpunim me Dhomën Ekonomike të Gruas, mblodhi dhjetëra sipërmarrëse elbasanase në një pasdite plot energji, dinamizëm dhe ide konkrete për rritjen e rolit të grave në ekonominë lokale dhe më gjerë.
Deputetja Mila u shpreh se ky takim ishte një mundësi e vyer për të dëgjuar nga afër realitetin e grave që udhëheqin biznese dhe sfidat me të cilat ato përballen çdo ditë.
Ajo theksoi se objektivi kryesor është që sipërmarrja e grave në Elbasan të ngrihet në standarde europiane, duke hapur rrugë të reja zhvillimi, inovacioni dhe fuqizimi ekonomik.
Në takim morën pjesë edhe dy nga figurat më të spikatura të Dhomës Ekonomike të Gruas, Sabina Osmani dhe Antonela Hako, kryetare e Dhomës, të cilat ndanë eksperiencën e tyre shumëvjeçare në mbështetjen e sipërmarrjes femërore.
Të dyja sollën ide dhe propozime konkrete për forcimin e pozicionit të grave në treg, rritjen e mundësive të punësimit dhe lehtësimin e proceseve për zhvillimin e bizneseve të reja.
Deputetja Mila u ndal me mirënjohje dhe admirim për gratë e pranishme, duke theksuar se ato janë “forca që e çon Elbasanin përpara çdo ditë, me punë, guxim dhe ambicie”.
Ajo shtoi se fuqizimi ekonomik i grave nuk është thjesht një synim individual, por një domosdoshmëri për zhvillimin e të gjithë komunitetit.
“Kur gratë bashkohen, fuqia shumëfishohet. Kur gratë fuqizohen, fuqizohet i gjithë komuniteti,” – u shpreh ndër të tjera deputetja Sara Mila.
Takimi u mbyll me angazhime konkrete për bashkëpunim më të ngushtë mes institucioneve dhe sipërmarrjes femërore, si dhe me zotimin për të kthyer idetë e diskutuara në projekte reale që ndikojnë pozitivisht në ekonominë lokale.
Ky aktivitet shënoi një tjetër hap të rëndësishëm drejt rritjes së rolit të gruas në sipërmarrje dhe konsolidimit të Elbasanit si qendër energjie dhe inovacioni për bizneset e drejtuara nga gra.
