Elbasani e pret sot Partizanin me objektivin e qartë për të marrë tri pikët, të cilat do t’i jepnin, të paktën për 24 orë, vendin e parë në renditjen e kampionatit. Përballë një kundërshtari të fortë dhe me eksperiencë, verdheblutë pritet të zbresin në fushë me një formacion të kujdesshëm, por njëkohësisht ofensiv.
Trajneri Ivan Gvozdenoviç mendohet se do t’i besojë skemës 4-2-3-1, një modul që i garanton ekuilibër mes fazës mbrojtëse dhe asaj sulmuese. Në portë pritet të jetë Janaçek, ndërsa reparti difensiv do të përbëhet nga Lila dhe Lajthia në krahë, me dyshen qendrore Lulaj–Olberkis, ku rikthimi i Lulajt i jep më shumë siguri mbrojtjes.
Në mesfushë, rolin e filtrit përpara mbrojtjes pritet ta mbajnë A. Kasa dhe Ibrahim, të cilët do të kenë detyrën për të thyer aksionet e Partizanit dhe për të nisur manovrën ndërtuese. Më përpara tyre, Manellari pritet të veprojë si organizator, i mbështetur në krahë nga Diallo dhe Bunjaku, të gatshëm për të krijuar epërsi numerike dhe raste shënimi.
Në majë të sulmit, Tsague shihet si pika kryesore e referimit në ofensivë, me detyrën për të finalizuar aksionet dhe për të vënë në vështirësi mbrojtjen e të kuqve.
Një fitore në këtë përballje do t’i jepte Elbasanit mundësinë për t’u ngjitur në krye të renditjes, duke e kthyer këtë ndeshje në një test të rëndësishëm për ambiciet e verdhebluve në vazhdim të sezonit.