Kreu i Partisë Demokratike, Sali Berisha, reagoi sot ndaj propozimit të kryeministrit Edi Rama për reformimin e komisioneve parlamentare. Sipas tij, pa ndryshuar rregulloren e Kuvendit, ndryshimet janë të pavlefshme.
“Ai i ka shpallur si për një institucion privat, komisionet, në një kohë kur rregullorja e parlamentit ka të përcaktuara 8 komisione. Pa ndryshuar rregulloren – dhe rregullorja ka procedurën e vet – nuk mund të ndryshojë në mënyrë të njëanëshme. Ky është një atentat, një provokacion i ulët ndaj opozitës,” deklaroi Berisha.
Kreu i PD-së kritikoi gjithashtu shuarjen e Komisionit të Integrimit, duke e cilësuar si një përpjekje për të heshtur zërin e opozitës. “Donte të shuante Komisionin e Integrimit duke besuar se kështu i priste mundësinë opozitës të flasë në Parlamentin Evropian dhe në vendet anëtare të BE-së. Por kjo nuk ndodhi. Opozita nuk humbi asgjë, ndërsa ai do të mbajë barrën e këtij veprimi,” shtoi Berisha.
Deklarata erdhi pas seancës së hapjes së Legjislaturës XI në Kuvendin e Shqipërisë, ku filluan punimet për këtë legjislaturë.